వినాయకుని వలే..

^{ఒకాయనకి   చిన్నచిన్న కళ్ళు.} 

^{ఇంకొకాయనకి పేద్ద పొట్ట.}

^{ఇంకొకాయనకి ఒళ్ళంతా చెవులే.}  

^{ఇంకొకరికి పొడుగు మూతి.}

^{ఈ అవలక్షణాలన్నీ ఒక్కరికే ఉంటే…..  ఊహించండి. ఎలా ఉంటాడు.}

^{ఇంకెలా ఉంటాడు. చాలా అందంగా ఉంటాడు.. మన వినాయకుడిలా.  ఇలా…}

^{ఏపార్టుకి ఆపార్టే చూస్తే ఏమాత్రం ఎవ్వరూ యిష్టపడని శరీరభాగాలున్న ఈయన సౌందర్యం ఎనలేనిది. అలాగే,  ఈయనని చిత్రపరంగా చిత్రవిచిత్రాలుగా చూపించచ్చు.}     

^{లాటిన్, అరబిక్ లాంటి ఫాంట్లతో  ఇలా ఉంటాడు.}

ȴ^{ة͠ Ͽ}

^{ముంబైలో ఆటోరిక్షాలమీటరు మధ్యనున్న ఎత్తైన ముక్కులాంటిదానికి పెయింటు వేసి వినాయకుడిరూపుకి తీసుకువస్తారు. జాలంలో చిత్రాలు చూడండి ఎన్ని రకాలుగా, ముద్దుగా ఉంటాయో.  ఆయన ఇలా ఆకులా కూడా ఇమడగలడు.. మాఇంట్లో యిమిడినట్లు.}

^{వినాయకుడి వంటి దైవం లేడు. ఎక్కువ ఆడంబరాల్లేకుండా చేసుకోగల వ్రతం వినాయక వ్రతం. మీరందరూ ఆయన్ని పూజించే ఉంటారని ఆశిద్దాం.. ముఖ్యంగా గత సంవత్సరం నీలాపనిందలకు గురైన బ్లాగర్లు.}

^{మీకూ, మీ కుటుంబాలకి వినాయకుని ఆశీర్వచనాలు లభించుగాక.}

ముంబై ముచ్చట్లు: వానా వానా ... వెంగళప్పా

వానా వానా వల్లప్పా.. అని మనం చిన్నప్పుడు వానొస్తే చాలు  అనందంగా గెంతులేసేవాళ్ళం.  ముఖ్యంగా కాస్త గట్టిగా కురిస్తే స్కూలుకి సెలవుండేది కాబట్టి మహా ఆనందం గా ఉండేది.  పెద్దయ్యాక వానకి, సెలవుకి సంబంధం తెగిపోయి ఎంత వానకురిసినా చిన్నప్పటి ఆనందం లేదుకానీ, తాగడానికి నీళ్ళు దొరుకుతాయన్న ఒకే ఒక కారణం సంతోషం కలిగిస్తోంది.

వానపాటలు, వాన మీదే ఆధారపడిన సినిమాలూ, తడి బట్టల హీరోయిన్లు… ఇవ్నన్నీ వర్షం మీద రోమాంటిక్ భావం కలిగిస్తే, వాన రాజకీయాలు రోతభావాలు కలిగిస్తాయి.

ముంబైలో మేమున్న 12 సంవత్సరాలలో ముందటేడు తాగడానికి కూడా నీళ్లు కరువైయ్యాయి. ఏలినవారు ఎలాగో అలా కోతలతో గండం గట్టెక్కించారు. ముంబై వర్షాలు ఇంతకు ముందుదాకా చాలా ఆనందంగా ఉండేవి.  గత కొన్ని సంవత్సరాలుగా సముద్రపు ఆటుపోటులు, భారీ వర్షాలు  కలిసి వస్తాయేమోనని భయపడుతూనే ఉన్నారు ముంబైవాసులు.. ముఖ్యంగా 26/7 వరదల తర్వాత.  ఆసందర్భంలో ముంబైవాసులు అనేక ఇక్కట్లకి గురయ్యారని మనం చాలా విన్నాం, చదివాం.  ఆతర్వాత ప్రభుత్వం మీద ప్రతిసంవత్సరం తగు ఏర్పాట్లు తీసుకోమని వత్తిడి వస్తోనే ఉంది. ప్రతి సంవత్సరం ఏలినవారు వుయార్ ఫుల్లీ ప్రిపేర్డ్ అని చెప్తోనే ఉన్నారు, ప్రజల ఇక్కట్లు మామూలే.  రోడ్లు … అంటే ఏమిటో మర్చి పోయాం మేము.  రైలు పట్టాలు పర్వాలేదు అనుకుంటే  కాస్త వర్షానికి కొన్ని చోట్ల పట్టాలు మునిగి పోయి మొన్నో రోజు 60 కిమీలు 5 గంటలలో చేర్చి, కొండోకచో అస్సలు చేర్చ లేక అవీ ఉపయోగకరం కాదని తెల్సింది.  

మనది పుణ్యభూమి అవడం వల్ల వరదలు రాలేదు. యజ్ఞాలు చేసి ప్రజలని రక్షించవచ్చని ఏలిన వారికి తట్టలేదు కాని లేకపోతే అవి కూడా చేయించేసి మరి కొన్ని డబ్బులు చేసుకోరా?   అన్నట్లు మా మేయరు గారు అన్నిటికీ పైవాడిదే భారం అని ఆత్మజ్ఞానం తెచ్చుకున్నదై 1200 మందితో తిరుపతి ప్రయాణమయ్యారు. అది తెలియని  ప్రతిపక్షాలవాళ్ళూ, గిట్టనివాళ్ళూ  తెగ ఆడిపోసుకుంటున్నారు. ధర్మభూమిలో ఇంత అధర్మపుటాలోచనలా. 

వానాకాలపు ఇక్కట్లు తప్పింటడానికి ఖర్చంటారా, పెడుతోనే ఉన్నారు. జనాలకే సుఖం లేదు.  వానలవల్ల ఆనందపడిన వాళ్లు  వానా వానా వల్లప్పా అని పాడుకున్నట్లే, వాటి ధర్మమా అని బాగు పడినవాళ్లు వానావానా వెంగళప్పలూ (పౌరులనుద్దేశించి అని వేరే చెప్పనఖ్ఖర్లేదుగా) అని పాడుకుంటున్నారు.

బహుకాల బ్లాగడం

ఈమధ్య బ్లాగులు చదువుతున్నా కానీ వ్రాయడం లేదు. కారణం పెద్దగా ఏం లేదు. బద్ధకం. అదీకాక అందరూ అన్నిటిమీదా తెగ బ్లాగేస్తూంటే ఏం రాయాలో తట్టట్లేదు. కుక్కపిల్లా, అగ్గి పుల్లా అని ఎన్నిసార్లు పునశ్చరణ చేసినా వ్రాతకి స్పూర్తి కలగట్లేదు. ఈలోపు మా స్నేహితుడికి మిత్రత్వదినం సందర్భంగా ఫోన్ చేస్తే ఎందుకు రాయడం లేదని అడిగాడు. తను రెండు మూడుసార్లు సత్యశోధనకి వెడితే కొత్త టపాలు లేవని, ఇలా గేపిస్తే ఇంక నా బ్లాగు ముఖం ఎవరూ చూడరని చెప్పాడు.  బ్లాగు రాస్తే స్నేహం కట్ అనే పరిస్తితుల్లో, రాయక పోతే బాధపడిన వాడే నిజమైన స్నేహితుడని సెంటిమెంటలయి పోయి మళ్ళీ రాద్దామని నిర్ణయించేసుకున్నా. అలా అని రోజూ రాసేయను అని హామీఇస్తున్నా.

భవదీయుడు

సత్యసాయి

శ్రావ్య కర్ణాటక సంగీత కచ్చేరి హైదరాబాదు చిక్కడపల్లి లో ఉన్న త్యాగరాజ గాన సభలో ఈనెల 13 వ తారీకున సాయంత్రం 6 గంటలకు జరుగుతుంది. దయచేసి వీలుచేసుకుని అందరూ వచ్చి ఆశీర్వదించండి.

వికృతి నామ సంవత్సర శుభాకాంక్షలు

ఈసంవత్సరం మీ అందరికీ శుభప్రదం కావాలని మనసారా సాయినాధుని ప్రార్ధిస్తున్నాను.

క్రితం సంవత్సరం వైయెస్ దుర్మరణం, తెలుగువాళ్ళమధ్య అకారణ అంతఃకలహాలు, అశాంతి, వరదలు, క్షామం, మండిన ధరలు,  ఒకటేమిటి మొత్తం సంవత్సరమంతా ఇలాగే గడిచింది. అన్నిటికన్నా ముఖ్యంగా బాధకలిగించినవిషయం తెలుగువాళ్ళ మధ్య సృష్టించబడ్డ విభేదాలు, వాటికి విద్యాధికులు కూడా లొంగిపోయిన వైనం. నాసహోద్యోగులు కొందరి వాదనలు వింటే ఎంతనేర్చినా కూడా విద్యావంతులు కూడా  భావావేశాలకి బానిసలని అర్ధమయింది.  నా దృష్టిలో విడిపోవడం సమస్యకాదు కానీ తెలుగువాళ్ళు ఒకళ్ళమీద ఒకళ్ళు బురదజల్లుకోవడం, ఓఇంట్లో గొడవపడుతుంటే  పక్కిళ్ళవాళ్ళు వినోదం పొందినట్లు మిగిలినరాష్ట్రాలవాళ్ళు, చిదంబర,మొయిలీయాదులు వినోదించడం, అన్నిటికన్నా ప్రజలమనసులు విరిచేయడం విషాదకరం.

ఈసంవత్సరం దీనికి భిన్నంగా, తన పేరు సార్ధకం చేసుకోకుండా అందరికీ ఆనందాల్ని పంచాలని మరోసారి కోరుకుంటూ

భవదీయుడు

సత్యసాయి కొవ్వలి

కొరియా కబుర్లు: నాలుగు నాళ్ళ అతిధి - లీ మ్యుంగ్ బక్

మన దేశానికి రిపబ్లిక్ డే అతిధిగా కొరియా రాష్ట్ర పతి లీ మ్యుంగ్ బక్ వచ్చిన సంగతి అందరికీ తెలిసినదే. ఆవిషయం వినగానే ఒక్కసారిగా నా కొరియా రోజులు నెమరుకు రావడం జరిగింది. నేనక్కడ ఉన్నప్పుడు శ్రీ లీ సియోల్ మేయర్ గా ఉండేవాడు. ఆయన పేరు చెప్పగానే నాకు గుర్తొచ్చేది జ్యోంగ్యిచియోన్ (Cheonggyecheon) కాలవ.  ఇది సియోల్ సిటీ హాల్ దగ్గరనుండి 10 కిమీ పైన ప్రవహిస్తుంది. దాని ఒడ్డున నడుచుకుంటూ పోవడం ఒక అనుభవం.  దీంట్లో గొప్పేముంది అంటారా.  ఈకాలవ పాతకాలం లో ఉండేది.  తర్వాత రోజుల్లో అభివృధ్ది పథంలో కాలవని మూసేసి, ఫ్లైఓవర్లు కట్టేయడం వల్ల అక్కడ ఓ కాలవ ఉండేదన్న విషయమే జనాలు మరచి పోయారు.  లీ మేయరుగా పోటీచేసినప్పుడు చేసిన వాగ్దానాలలో ఈకాలవ పునరుద్ధరణ ఒకటి.

ఎక్కడ చూసినా నీతిమాలిన రా.నా.లే ఉన్న లోకంలో పదవిలోకొచ్చి తన వాగ్దానాలని నెరవేర్చిన ఘనత శ్రీ లీ దే అయుండచ్చు. ఈకాలవ సియోల్ నగరానికి కొత్త శోభని తీసుకురావడంతో పాటు, ఒక సాంస్కృతిక కూడలిగానూ, పర్యావరణ పునరుద్ధరణ కృషికి సంకేతంగానూ శోభిల్లుతోంది.  నాస్నేహితుడితో పాటు నేను సుమారు 3 కిమీ నడిచా. అప్పుడు తీసిన కొన్ని జ్ఞాపికలు ఇక్కడ ఇస్తున్నా. 

View Full Album

అసలైన హీరో .. మీరే అవచ్చు

మా స్నేహితుడు తనపై వచ్చిన ఒక ఫిల్మ్ కి లంకె పంపించాడు.

ఆసైట్లో మీ ఫొటో అప్లోడ్ చేస్తే మిమ్మల్ని హీరోగా పరిచయం చేసి ఆకాశానికి ఎత్తుతారు. 

ఆలంకె పట్టుకుని బాబాని హీరోగా పెట్టి తీసిన లఘుచిత్రం ఇక్కడ చూడండి. కొన్ని తెరపట్లు ,,,,,

శ్రావ్య పాటలు

శ్రావ్య వరాళి త్యాగరాయగానసభలో 6 డిసెంబరు 2009 న పాడిన పాటలు ఈస్నిప్పులో ఇక్కడ వినప్రార్ధన.
సత్యసాయి

త్యాగరాజు తెలంగాణా ద్రోహా?

ఆదివారం డిసెంబరు 6 న త్యాగరాజగానసభకి వెళ్ళాం. కిన్నెర ఆర్ట్స్ ధియేటర్ వాళ్ళు నిర్వహిస్తున్న నెలవారీ బాలల సాంస్కృతికోత్సవంలో మా అమ్మాయి చి.శ్రావ్యవరాళి (బ్లాగు: వరాళి వీచికలు) కర్నాటక సంగీత కచేరీ ఆరోజు 6 గంటలకి పెట్టిన సందర్భంగా అక్కడికి వెళ్ళాం.  ముందురోజు తెరాస కార్యకర్తలు త్యాగరాజ గాన సభ బోర్డుమీద తెలంగాణా వాగ్గేయకారుడు సుద్దాల హనుమంతు గానసభ అని, కళా సుబ్బారావు కళావేదిక (మినీ హాలు) బోర్డు మీద కాళోజీ కళావేదిక అని   ఎర్ర స్టిక్కర్లంటించారు. నిర్వాహకులు ఆరోజు, ఆతర్వాతి రోజు కార్యక్రమాలు రద్దు చేసారు. ముంబై నుండి వచ్చామని కనికరం తో మా అమ్మాయి కచేరీ జరిగింది. చాలామంది రావలసిన వాళ్ళు ఊర్లో పరిస్థితికి భయపడి రాలేదు.  చివరిదాకా ఉండిన అనిశ్చిత పరిస్థితివల్ల మేం కూడా ఎవరికీ ధైర్యంగా చెప్పనుకూడా లేదు. అయినా దేఁవుడి దయవల్ల హాలు సగం వరకూ నిండింది. కార్యక్రమం సవ్యంగా జరిగింది. ఆతాలూకు వార్తావిశేషం కింద చూడండి.   చి.శ్రావ్యకి మీ అందరి ఆశీస్సులు అందజేయమని ప్రార్ధిస్తున్నా. 

 

 

ఇదిలా ఉంచితే అసలు త్యాగరాజుకి తెలంగాణాకి సంబంధం ఏంటో నాకర్థంకాని విషయం.  ఆయనపేరుని ఈసభకి పెట్టడం కోస్తా ఆంధ్ర వాడని పెట్టారా? అలాగే కళాసుబ్బారావుకి త్యాగరాజగానసభకీ ఉన్న అనుబంధాన్ని పక్కకి తోసేసి కేవలం తెలంగాణా వాడని కాళోజీ పేరు పెట్టడంలో ఔచిత్యం ఏంటో?  పొట్టి శ్రీరాముల విగ్రహం, తెలుగు తల్లి విగ్రహం బద్దలు కొట్టడం తాలిబాను చేష్టలకి తీసిపోలేదు.  తెలంగాణాలో మాట్లాడేది తెలుగు కాదా?

సత్యశోధన అవసరమా?

(ఈటపా ఎప్పుడో రాసినది .. అయినా సత్యశోధనకి సమయం మించిపోవడం ఉండదుకదా అని పోస్ఠ్ చేస్తున్నా.)

ఈమధ్యలోఎదుటి మనిషిచేత నిజం చెప్పించాలని ఓ టీవీ కార్యక్రమం కంకణం కట్టుకొంది.  స్టార్ ప్లస్ లో వస్తున్న సచ్ కా సామనా చూసే ఉంటారు.  మా పిల్లలు చెప్తే ఒక ఎపిసోడ్ చూసా.  తర్వాత మరొకటి. ఇందులో 21 ప్రశ్నలకి నిజం చెప్పగలిగితే కోటి రూపాయలు వస్తాయి.

మొదట చూసిన ఎపిసోడ్ లో ఒకావిడని (స్మిత అనుకుంటా) రాజీవ్ ఖండేల్వాలా (పృచ్ఛకుడు) ప్రశ్నలడుగుతూ పోయాడు.  ఆవిడ ఒక స్థాయికి వచ్చేసరికి, ఇబ్బందికరమైన ప్రశ్నలడగడం మొదలెట్టాడు. ఇది ఆయన స్ట్రాటజీ. ఒకస్థాయినుండి ఇంకో దానికి వెళ్ళేముందు షోనుండి వెళ్ళిపోవడానికి అవకాశం ఇస్తారు.  ఇంకా ముందుకెళ్తుందనుకున్నఆవిడని అడిగిన ప్రశ్న.. మీపతికి ఎప్పటికీ తెలియదని మీకు నమ్మకంగా తెలిస్తే మీరు వేరేమగవాడితో పడుకుంటారా? ఆడమగ సంబంధాలలో ఎన్ని రకాల శృతులూ, అపశృతులూ ఉంటాయో అవగాహన ఉన్నా, ఈప్రశ్న అడగడం ఎబ్బెట్టుగా అనిపించింది. దీనికి ఆవిడ నో అన్నా, పోలీగ్రాఫ్ ఒప్పుకోలేదు. అప్పటి ఆవిడ పరిస్థితి ఎంత దుర్భరమో ఊహించండి. అందులోనూ ఆవిడమొగుడు అక్కడే ఉన్నాడు.  

నే చూసిన రెండో ఎపిసోడ్లో పాల్గొన్నాయన చాలా  ఓపెన్గా ఉన్నాడు. తీరా ముందుకు వెళ్తున్న సమయంలో, మీరు విదేశం వెళ్ళినప్పుడు అక్కడ వేశ్య…  అని ప్రశ్న మొదలెట్టగానే వాళ్ళావిడ బజ్జర్ నొక్కి ఆప్రశ్నపట్ల తన వ్యతిరేకత తెలియచెప్పింది (షోలో కూడా వచ్చిన వారికి తమ అభ్యంతరం షోలో ఒక్కసారి చెప్పే అవకాశం ఇస్తారు).   వెంటనే పృచ్ఛకుడు ప్రశ్నమార్చి మీరెప్పుడైనా మీభార్యని మోసం (పరాయసంబంధాలు పెట్టుకోవడం ద్వారా) చేసారా అని  ప్రశ్నించాడు.  దీనికి ఆయన పెళ్ళాం ఎదురుగా  ఏంచెప్పాలో తికమక పడి లేదన్నాడు. పోలీగ్రాఫ్ పరీక్షప్పుడు ఎస్సని ఇప్పుడు నో అనేసరికి ఆమానవుడు షోనుండి వెనుదిరగాల్సొచ్చింది.  తర్వాత అక్కడికక్కడే తన భార్యముందు చాలా ఇబ్బంది పడ్డాడు.

అసలు ఈపోలీగ్రాఫ్ ఏంటయ్యా అంటే మనం సమాధానాలు చెప్పినప్పుడు మన శరీరంలో జరిగే మార్పులని, రక్తపీడనాన్ని బట్టి మనం చెప్తున్నది నిజమా, అబద్ధమా అన్నది నిర్ధారిస్తుంది. అది ఎంత ఖచ్చితంగా నిర్ధారించగలదూ అన్న విషయం పక్కనపెడితే, అసలు ఇంత కష్టపడీ, పెట్టీ  నిజం చెప్పించడం, షోకోసమైనా సరే, అవసరమా? 

అవసరమైనప్పుడు అంటే ప్రాణమానవిత్తభంగములందు అబద్ధమాడచ్చునన్నది ఆర్యవాక్యం. ఇవన్నీ భంగమైనా సరే నిజం చెప్పించడం మాత్రమే మన టీఆర్పీ రేటింగ్‌కి అవసరం అన్నది వ్యాపార సూత్రం అనుకుంటా.

ఎంత అబద్ధాల కోరైనా ఆవిషయం ఒప్పుకోడు. తనంత సత్యసంధుడు ఎవరూ లేరనే అనుకుంటాడు.  సత్యం శివం సుందరం అన్న భావనలో ఇది ఒక కోణం అని ఒకాయన సెలవిచ్చాడు. అలాగే ఎవరినైనా నిజం చెప్పు… నిజం చెప్పని రాపాడిస్తే వచ్చే ఇబ్బంది అంతా ఇంతా కాదు.  ఇంకా ఘోరం ఏంటంటే నిజంగా నిజం చెప్తున్న వ్యక్తిని నిజం చెప్పు అని నిలదీస్తూ పోవడం. అప్పుడావ్యక్తికి కలిగే మానసిక వేదన అంతా ఇంతా కాదు.   ఇలాంటి సందర్భం మొగుడూ పెళ్ళాల మధ్య వస్తే ఇంక చెప్పక్కరలేదు.

సాధ్యమైనంత వరకూ నిజాయితీగా, సత్యవాదిగా ఉండడం ఆదర్శప్రాయంగానూ, అత్యుత్తమ జీవన విధానంగానూ ఒప్పినా చాలాసందర్భాల్లో, అబద్ధం చెప్తున్నారని తెలిసినా కూడా ఎదుటివారికి ఎంతో కొంత వెసులుబాటు వదలడం విజ్ఞత.